اسماعيل کريم زاده آنما تؤره نی

گنج ميلتچي و شاعير اسماعيل کريم زاده اوچون اورمو شهرينده بير آنما مراسيمي کئچيريلدي، بيليم يولو، سئوينج و بوتا درنکلري طرفيندن قورولان بو مراسيم اورمو شهري مهديه تالاريندا اورموميلتچي لري، شاعير، يازار و ادبياتچيلارينين ايشتراکي ايله کئچيريلدي. عليرضا قولونجونون آپاريجيليغی ايله کئچيريلن بو آنما تؤره­نينده حميد شافعي، اسماعيل اولکر، فرشيد فرشيد فر، مسعود هاراي، زينب حسين زاده، نرگس اعظميان، محمد صبحدل، خليل شيخلو، بولود مرادي،  فتح اله شيخلو، سنجيده، غني زاده و ... اؤز شعرلري و صؤحبتلري ايله چيخيش ائتديلر . رحمتلي اسماعيل کريم زاده­نين سئچيلميش شعرلريندن عيبارت اولان بير جوزوه مراسيمه قاتيلانلارين آراسيندا پايلاندي .

اسماعيل كريم زاده ۱۳۶۰- جي گونش ايلينين پـاييزيندا دونيـايا گؤز آچميش، ۱۳۸۳- جوسونـون قيشيندا دونياسيني ده­ييشميشدير. آرتيـق عؤمور سورمه­‌دن سانكي بير تاريـخ قدر ياشاميش، ياشاياجاقدير. اونون دنيز دولو كؤورك اينسان دويغولاري اورمو شهرينين دوشونجه محفيل لرينه، گؤزلرينين ياشيلليغي قدر آيدين دير. يانيميزدان كؤچن شاعيريميز، يولداشيميز، فيكيرداشيميز، شئعرلري ايله ياشاياسي، اؤزگون دونيـا گؤروشونو آنلاداسي اولوب، آرتيق دئمه يه گلمـزكي دوشونن ايييد اوچون اؤلوم آنلامسيـز بير يالاندير. يالنيز اونون عؤمور بويو توتدوغو يول اوچون قورولـدوغو آنمادا، حقيقي«اسماعيل»يميزي شعيرلرينين سطير- سطيريندن تانيياجاييق.

دئيه- دئيه:        سسيميز يانيندادير

                                           سسيميز سنينله­دير...