ايراندا پرزيدنت سئچکيلري حاقدا بيلديري:

آذربايجان سئچکيلره قاتيلماياجاق

بو گون آذربايجانين سعادتي اوغروندا خالقيميزين فداکار و غيرتلي اوغول و قيزلارينين ايللرجه بوندان قاباق باشلاديغي قوتسال ميلي حرکتين سيخينتيلي دورومو هامييا بلليدير. ميلي-مدني مراسيملريميزين کئچيريلمه سينه ايذن وئريلمير و چاليشقانلاريميز بوتون فعاليت ساحه لرينده توتولوب ايشکنجه ائديله رک زيندانلارا سالينير. بونا آشکار نومونه اولاراق پان آرياييسم و شؤونيستي فيکيرلرين تأثيرينده اولان ايران دولتي نين جاري ايلين تير آييندا بابک قالاسي قورولتايينداکي آغير و ضيد اينساني مقابله سيني گؤسترمک اولار.

تأسوف لر اولسون کي آذربايجان و اونون غيرتلي ائولادينا اولونان اهانت و باسقيلاري هاميميز گؤره-گؤره بعضي چاليشقانلار آراسيندا آذربايجانين ايراندا يئددينجي پرزيدنت سئچکيلرينه نئجه قاتيلماسيندان سؤز گئدير.

آذربايجان کئچميشده دولتين تامام جيناحلاريني سيناميش و اونلارين هاميسينين جينايت و ظولمونه شاهيد اولموشدور. اينديسه دونيادا و خالق ايچينده محبوبيت و مشروعيتيني ايتيرن ايران دولتي کئچيريله جک پرزيدنت سئچکيلرينه آرتيق اهميت وئرير و مختليف يوللارلا خالقي سس وئرمه يه جلب ائتمک ايسته يينده دير. بللي اولدوغو قدر حاکيميت طرفيندن ايللر بويو طبيعي و انساني حاقلاري تاپدالانميش ايران خالقلار و ميلتلري نين سئچکي لره قاتيلماسي اوچون آيريجا سناريولار يازيليب و پلانلار تؤکولوبدور.

بيز بو مسئله ايله باغلي بوتون آذربايجان چاليشقانلاريني آييقليغا چاغيريريق. آذربايجانليني هر هانسي قوندارما استدلال و بهانه ايله پرزيدنت سئچکيلرينه قاتيلماغا چاغيران هر قروپ, شخص و تشکيلاتين عملينين يانليش اولدوغونو خاطيرلادير و بو عملي آذربايجانين ميلي اصوللارينا قارشي بيليريک. لازيم گلدييي حالدا گله جک فورصتلرده يئني معلومات و آچيقلامالار وئريله جکدير.

آذربايجان ميلي حرکتينين بير قروپ چاليشقانلاري