| AMERİKA İRANI ŞİƏLƏRİN DÜŞMƏNİ SAYIR |
The New York Post qəzeti İranın İraqda şiə kartından istifadə etmək cəhdləri barədə məqalə dərc edib. Məqalədə bildirilir ki, Tehrandakı rəsmi mətbuat İraq
şiələrini dəstəkləyir, həmçinin İran
tərəfindən maliyyələşdirilən
Hizbullah təşkilatının İraq bölməsi
təxribatları gücləndirib. Müəllif Əmir Tahiri
hesab edir ki, İranın şiələrin ən yaxın
müdafiəçisi rolunda çıxış etmək
cəhdləri uğursuzdur. Çünki şiələrə
ən böyük zərbəni İran özü vurub.Yazıda qeyd olunur ki, İrandakı rejim şiəlikdən çox uzaq olan xomeynizm ideologiyasına əsaslanır. Bu ideologiyanın ilk qurbanları isə şiələr olub: Xomeyniçilər əksəriyyəti şiələrdən ibarət olan 100 mindən çox iranlını dar ağacından asıb. Onlar həmçinin İran-İraq müharibəsində milyona yaxın şiənin də ölümünə səbəb olublar. 3,5 milyona yaxın şiə isə İrandakı rejimin əlindən didərgin düşüb.
Müəllif İranın hazırda İraqda birləşmiş şiə cəbhəsinin yaranmasının qarşısını almağa çalışdığını və müvəqqəti hakim Şurada təmsil olunan şiə liderlərin arasına nifaq saldığını qeyd edir: Xomeyniçilər Əfqanıstandakı şiə icmasının da parçalanmasına görə məsuliyyət daşıyırlar. Şiəlik və xomeyniçilik arasında heç bir bağlılığın olmadığını aydın şəkildə Azərbaycan nümunəsində də görmək olar. Azərbaycan əhalisinin əksəriyyəti şiələrdən ibarət olan ölkədir. Lakin İran ötən on il ərzində xristian Ermənistanı Azərbaycana qarşı işğalçılıq müharibəsində dəstəkləyib. İran 1992-ci ildə Qarabağa hücum edərək oranı zəbt edən erməni qüvvələri üçün arxa cəbhə rolunu oynayıb. Qarabağdakı 800 minə yaxın şiənin köçürülməsi əməliyyatına İran bilavasitə dəstək verib. Onların evlərinin ermənilər tərəfindən daşınması da məhz İranın verdiyi yük maşınları ilə həyata keçirilib.
Müəllif qeyd edir ki, xomeyniçilərin məqsədi şiələrin birləşməsinə və öz maraqlarını təmin etməsinə mane olmaqdır: Xomeyniçilərin məqsədi odur ki, şiələr həmişə bölünmüş şəkildə qalsınlar və Tehrandan asılı olsunlar.
Müəllifə görə, xomeyniçilik ideologiyası əslində kokteyldir və şiəlik bu kokteylin yalnız komponentlərindən biridir: Bu ideologiyanın əsas şüarı Qərbə, əsasən də ABŞ-a nifrətdir.
İnformasiya şöbəsi