2010 - cu il 27 fevralda İsveçin paytaxtı Stokholm şəhərinin
mərkəzi meydanında Xocalı faciəsinə həsr
olunmuş etiraz aksiyası keçirildi. Aksiyaya təkcə
Stokholmdan yox, İsveçin Upsala, Linköpinq, Göteburq və digər
şəhərlərində yaşayan azərbaycanlılar da
təşrif gətirmişdirlər. Təqribən 200
nəfərin iştirak etdiyi aksiyada azərbaycan, isveç və
ingilis dillərində yazılmış şüarlar nümayiş
olundu. Onlar aşağıdakılardan ibarətdir:
a)
Ermənistan dərhal
və qeydi - şərtsiz işğal
etdiyi Azərbaycan torpaqlarından çıxmalıdır! (Armenia
must leave the occupied azerbaijani territories immediately and unconditionally)
b)
Avropa
Birliyi Azərbaycanın 1 milyondan artıq müharibə qaçqınına
göz yumur. (EU turns
a blind eye to more than one
million Azerbaijani refugees of war)
c)
BMT
qətnamələrini yerinə yetiməkdən imtina etdiyinə
görə Ermənistanı
məhkum et! (Condemn
Armenia for refusing to implement the UN's resolutions)
d)
Xocalıda
törətdiyi genosidə görə Ermənistanı
məhkum et! (Condemn Armenia for the genocide committed in
Khojaly)
Aksiyaboyu isveç və ingilis dillərində aksiyanın
minlərlə qətnaməsi
paylandı. Meydanda Xocalının dəhşətli
faciəsini özündə təzahür etdirən fotolardan ibarət 5
stend yer almışdı, Qarabağın və Xocalının
əks olunduğu Azərbaycanın böyük xəritəsi üzərində
maraqlananlara Qarabağ haqda məlumat verilirdi. Eyni zamanda ayrıca
təşkil olunmuş sərgi masasının üzərində
6 dildə Qarabağ faciəsi ilə bağlı çəkilmiş
sənədli video disklər və CD - lər düzülmüşdür
ki, bu maraqlananlara təqdim edilirdi. Erməni vəhşiliyi
nəticəsində qətlə yetirilmiş insanların
ruhuna ehtiram əlaməti olaraq foto stendin ətrafına şamlar
düzülmüşdü.
Bu əyani vəsaitlər meydana toplaşan İsveç
ictimaiyyətinin diqqətini cəlb etdi, onlar çox böyük maraq göstərir
və aksiyaboyu aksiyadan film və şəkillər çəkirdilər
Azərbaycanın himni ilə başlanan aksiyada
azərbaycan, ingilis və isveç dillərində aksiyanın
qətnaməsi oxundu, Xocalı faciəsi ilə bağlı
hazırlanmış sənədli, musiqili materiallar isveç
və ingilis dillərində səsləndirildi. İsveçdəki
Uyğur -- İsveç Maatif Dərnəyinin rəhbəri Əhməd
Tursun çıxış edərək, bizim haqq səsimizə uyğur
qardaşlarımızın da səs verib, bizlə birgə
olduqlarını bildirdi. Upsala Universitetinin tələbəsi Vüsal
Əliyev iki dildə, Göteburq Universitetinin tələbəsi
Fərrux Əliyev iki dildə və Linköpinq Universitetinin
tələbəsi Mahirə Muxtarova ingilis dilində Xocalı
faciəsi ilə bağlı xüsusi hazırladıqları
material və şüarları meydanda oxudular.
Meydana toplaşmış aksiya iştirakçılarının
da qeyd etdiyi kimi, aksiyanın əsas əlamətdar
tərəflərindən biri iştirakçıların çox
hissəsinin Xocalı faciəsinin şahidi olmayıb, bu haqda
yalnız kitablardan tanış olmuş İsveçdəki
Azərbaycan gənclərindən ibarət olması idi. Aksiya
iştirakçılarının ümumi fikrinə görə, bu mitinq
İsveçdə azərbaycanlıların bu vaxta qədər keçirtdikləri
ən möhtəşəm tədbir idi və bu da təsadüfü
deyildi. Bu tədbirin keçirilməsi üçün yaradılmış
Qarabağ Komitəsi son 3 ay ərzində böyük bir təşkilati
iş aparmış, həm tədbirin geniş formada təbliğatını
təşkil etmiş və həm də yüksək
səviyyədə əyani vəsaitlər hazırlamışdılar.
Tədbirin gedişatı ən kiçik detallarına qədər
işlənmiş, kimin nə işlə məşğul
olacağı təşkilatçılar arasında bölünmüşdü.
Qarabağ Komitəsi öz işini Xocalı aksiyası keçirməklə
bitmiş hesab etməyib, bundan sonra da Qarabağın müdafiəsi
ilə bağlı davamlı iş aparmaq fikrindədir.
Xocalı faciəsinin ildönümü Stokholmda möhtəşəm aksiya ilə qeyd olundu:27.02.10